Бүгін Үкімет отырысында Энергетика министрі Нұрлан Ноғаев газ экспортының былтырғы жылмен салыстырғанда төмендеп кеткенін айтты. 2020 жылдың 9 айында елімізде 41,6 млрд текше метр газ өндірілген.
«Тауарлық газды ішкі тұтыну көлемі 11,1 млрд текше метрге жетті. Бұл 9 айлық жоспар 100 пайыз орындалды деген сөз. Экспортқа шығарылған газ көлемі 10,3 млрд текше метр. Бұл есепті ай жоспарының 78,6 пайызына тең. Газ экспорты көлемінің өткен жылғы осы кезеңінің көрсеткіштерінен артта қалуына Қытай Халық Республикасының газ импорты көлемін төмендетуі себеп болып отыр», - деді Нұрлан Ноғаев.
Министрдің айтуынша, елімізде газдандырылған аймақтар 100 пайыз көгілдір отынды тұтынып отыр. Бірақ газ құбыры тартылып, газсыз отырған ауылдар көп. Мәселе Алматы облысы Іле ауданы Жетіген ауылында газ құбыры тартылғанына екі жыл болды. Басында әнші-күйшілерді шақырып, газ келді деп тұсауын кескеніменен, облыс басшылығы кеткеннен кейін-ақ газ сап тыйылған.
Жамбыл облысының Шу, Рысқұлов аудандарында да осы жағдай. Шу ауданы Төле би ауылының тұрғындары газ тартудың қымбаттығын айтып шағымданған. Ауылға газ құбыры бірнеше жыл бұрын тартылған, бірақ кей тұрғындар әлі қосыла алмай отыр. Себебі үйге газ тарту жұмысының құны 2016 жылы 420 мың теңге болса, биыл 520 теңгеге дейін өсіп кеткен. Төле би ауылында 4200 отбасы тұрса, қазір соның 35 пайызы ғана газ қолданып отыр.
Рысқұлов ауданы Құлан ауылының да тұрғындары ауылға келіп тұрған газды пайдалана алмай отыр. Себебі бір көшеге тартылған газ құбыры екінші көшеде жоқ.
Мұндай мысалдарды күнделікті жаңалықтар легінен ондап, бәлкім, жүздеп кездестіруге болады. Жамбыл облысындағы осы газ мәселесі бұрынғы әкім Асқар Мырзахметовтің кезінде де шешілмеген. Қазіргі әкім Бердібек Сапарбаев та шеше алмай отыр. Ал Алматы облысы Іле ауданы Жетіген ауылының газ мәселесі облыс әкімі Амандық Баталовтың құлағына әлі жетпесе керек. Сонда Ноғаевтың жүз пайыз орындалған жоспары қай жоспар? Сенатор Ақылбек Күрішбаевтың: «Қағаздағы әдемі баяндама ауылдағы жағдаймен сәйкеспейді» деген сөзі тек астыққа қатысты болмаса керек. Нұрлан Ноғаев соны ескермеді, әлде ескергісі келмей отыр.
Ал газ экспортының төмендеуін айтпай тұра тұрайық...
Байланысты жаналықтар
MalimBlocks
Жаңа облыстарда үй бағасы үш айда қалай өзгерді?
Президент Қасым-Жомарт Тоқаев 16 наурыз күні Қазақстан халқына жолдауында үш облысты бөлу туралы шешім қабылдағанын айтып, жаңа облыс орталықтарын таныстырған еді. MalimMedia сол жаңалық шыққан күннен бастап жаңа орталықтардағы тұрғын үй бағасын салыстырып көрдік.
Жаңа облыстардағы әкімшілік ғимараттар үшін бюджеттен 12 млрд жұмсалады
Жаңа құрылған Алматы, Жетісу, Қарағанды, Ұлытау, Шығыс Қазақстан және Абай облыстарында әкімшілік ғимараттарды сатып алу, жөндеу және жалға алу үшін 12 миллиард теңге жұмсалады. Бұл туралы ұлттық экономика министрі Әлібек Қуантыров айтты.
Ең кедей облыс: Жетісудың арқасында Қызылорда алға шықты
Экономиканы зерттеу институты Қазақстанда бөлінетін үш облыстың инвестициялары қалай өзгеріске ұшырайтынын көрсетті. Айта кетейік, Алматы облысының бөлінуі әсерінен инвестиция тарту бойынша соңғы орында қалып келген Қызылорда облысы тізімде алға жылжитын болды.