Ресей Қазақстанға гуманитарлық көмек бермек

Ресей дәрі-дәрмек жетіспей жатқан Қазақстанға коронавирусқа қарсы дәрі-дәрмек жөнелтпек. Бұл туралы Kaztag.kz-ке сілтеме жасап Malim.kz хабарлайды.

Гуманитарлық көмектің алғашқы рейсі бүгін кешке ұшақпен жөнелтілмек.

«Қандай тізім жіберілетіні қазір анықталып болды, гуманитарлық жүк жақын арада Қазақстанға жеткізіледі. Менің білуімше, бүгін кешке алғашқы ұшақ болу керек», - деді РФ денсаулықсақтау министрінің орынбасары Олег ГРИДНЕВ.

Гриднев айтқан тізімге коронавирустан емдеуге арналған ресейлік дәрі-дәрмек өнімдері кіргізілген.

Соңғы кездері Қазақстанда инфекцияның асқынуына байланысты дәрі-дәрмек жетіспей, дәріханаларда ұзын-сонар кезектер пайда болып жатыр. Әлеуметтік желілер мен мессенжерлерде дәрі таппай, наразы болған жұрт ел билігін сынға алып келеді. Осындай жағдайда РФ денсауминінің орынбасары Гриднев бастаған 32 маман 6 шілде күні Қазақстанға келген. Олар тәжірибесімен бөлісіп, қазақстандық әріптестеріне кеңес бермек. Мұндай делегация ертеректе Қытайдан да келгенін айта кету керек.

Еске сала кетейік, кеше ғана ресейлік кейбір сарапшылар Қазақстанда екінші мәрте карантин жарияланғанын сынаған.