Қазақ палуаны АҚШ-та белгісіз жағдайда көз жұмды
Мұхамбет Қуатбек 2014 жылы Нанкинде өткен жасөспірімдер Олимпиадасында топ жарып, кейін жасөспірімдер арасында Азия чемпионы, әлем чемпионатының қола жүлдегері атанған.
2014 жылы Жасөспірімдер арасындағы екінші жазғы олимпиада ойындарында чемпион атанған қазақстандық еркін күрес палуаны Мұхамбет Қуатбек 27 жасында АҚШ-та белгісіз жағдайда дүниеден өтті, деп жазды KAZINFORM.
27 жастағы спортшы жасөспірімдер арасында биік белестерді бағындырып үлгерген болатын. Ол 2014 жылы Нанкинде өткен жасөспірімдер Олимпиадасында топ жарып, кейін жасөспірімдер арасында Азия чемпионы, әлем чемпионатының қола жүлдегері атанған.
Ал соңғы жылдары Мұхамбет Америкада тұрған.
Танымал спортшының қазасы туралы белгілі спорт журналисі Данияр Кәрімжан мәлімдеді.
«Мұхамбет балуан 16 наурыз күні АҚШ-та көз жұмды. Ол соңғы екі жылда Филадельфияда тұрған. Оның неден қайтыс болғаны белгісіз. Қазіргі таңда палуанның денесін елге әкелу мәселесімен елшілік айналысып жатыр», — деді журналист.
Артынша бұл қаралы хабарды Қазақстан күрес федерациясының баспасөз хатшысы Аспандияр Есенжолов та ресми түрде растады.
«Өкінішке қарай, осындай хабар алып отырмыз. Тәуелсіз Қазақстан тарихында еркін күрестен жасөспірімдер Олимпиадасында топ жарған палуанымыз Мұхамбет Қуатбек өмірден өтті. Туыстары мен ата-анасына қайғыра көңіл айтамыз. 27 жастағы балуан соңғы жылдары АҚШ-та өмір сүрді», — деді Есенжолов.
ФОТО: ИНТЕРНЕТТЕН
Байланысты жаналықтар
MalimBlocks
