Қазақстан халқының бірлігі мерекесіне орай Шымкентте «ShymQala» этноауылы ашылды. Бұл кешен турист тартып, қала тұрғындары мен қонақтарына демалыс алаңына айналмақ. Кешенге бұрынғы заманның қорғанына кіргендей оңтүстік және шығыс қақпалары арқылы кіреді. Этноауылдың қос қақпасы қала тұрғындары, қонақтары үшін ерте көктемнен күзге дейін, дүйсенбі мен жексенбі аралығында әрдайым ашық болмақ.
Әдеп-ғұрып пен салт-дәстүрдің орталығына айналады деген бұл кешеннің ашылуына қала әкімі Мұрат Әйтенов пен орынбасарлары, этномәдени бірлестіктердің жетекшілері, зиялы қауым өкілдері қатысты. Олар ең алдымен Тәуелсіздік саябағында Қазақстан халқының бірлігі мен ынтымақтастығы құрметіне 70 көшет отырғызды.
Этноауылдың алғашқы қонақтары садақ ату алаңшасында жебе атып, туристік орталықтың жұмысымен танысты.
- Баршаңызды бүгінгі мерекемен құттықтаймын. Қазақстан әлемде баламасы жоқ Ассамблея құрып, дүниежүзіне үлгі болып отыр. Ал бүгінгі ашылған «ShymQala» этноауылы үшінші мегаполистің үлкен жаңалығы болып отыр. Қаламызға келген қонақтарды ең алдымен осында алып келу керек. Бұл кешен Шымкенттің туризм әлеуетін жаңа белеске көтереді деп сенеміз, - деді қала әкімі Мұрат Әйтенов.
