Венгрия Украина мен Молдованың Еуропалық Одаққа мүшелікке өтуін қолдайтын, ЕО-ның барлық 27 мемлекеті атынан жолдануы тиіс хатқа қарсы шыққан жалғыз ел болды. Бұл туралы Брюссельдегі екі дипломатқа сілтеме жасаған Politico басылымы мәлімдеді, деп хабарлайды Malim.kz.
Аталған хатты Еуропалық кеңес пен Еуропалық комиссияға жолдау – Украина мен Молдованың ЕО-ға кіру жөніндегі келіссөздерін ілгерілету үшін қажет негізгі рәсімдік қадамдардың бірі.
Politico мәліметінше, бұл ұстаным Венгрияның жаңа премьер-министрі Петер Мадьярдың Украинаның ЕО мүшелігіне қатысты сақ көзқарасына сәйкес келеді.
Саясаткер Украина үшін келіссөздердің алғашқы кезеңін ашуға қарсы болмағанымен, оның үкіметі өткен аптада Брюссельде өткен ЕО көшбасшыларының кездесу қорытынды құжатынан Украинаға қатысты «мүмкіндігінше тезірек» деген тіркесті алып тастауды талап еткен.
«Барлығы алты келіссөз кластері бар. Біз олардың барлығын бірден ашуды дұрыс деп санамаймыз. Біріншіден, алғашқы кластер бойынша жұмыс әлі толық аяқталған жоқ. Екіншіден, бұл Батыс Балқан елдеріне – Сербия, Албания, Черногория және Солтүстік Македонияға қате белгі беруі мүмкін. Олар ЕО-ға кіру үшін ұзақ жылдар бойы жұмыс істеп келеді», – деді Петер Мадьяр.
