Талдықорғандағы түнгі көңіл көтеру орнында жалаңаштанған қыздар мен жігіттер келушілердің көзінше провокациялық шоу ұйымдастырған сәтінің видеосы әлеуметтік желіде жарияланды. Жарияланымдардан кейін Жетісу облысының полициясы оқиғаның барлық қатысушыларын анықтап, оларды жауапкершілікке тартты.Бұл туралы Stan.kz сайтына сілтеп Malim.kz. хабарлайды.
Әлеуметтік желілерде тараған бейнематериалдардан кейін полицейлер Талдықорған қаласындағы аталған оқиға болған қоғамдық орынды және оның барлық қатысушыларын жедел анықтады.
"Қоршаған ортаға деген анық құрметсіздік танытып, қоғамдық тәртіпті бұзған азаматтарға қатысты, соның ішінде мекеме иесіне және бірнеше тұлғаға әкімшілік материалдар жинақталып, арнайы әкімшілік сотқа жолданды. Сот шешімі бойынша мекеме иесі мен қатысушылардың біріне 7 тәулік әкімшілік қамау жазасы тағайындалды", - делінген хабарламада.
Ал тағы бір қатысушыға қатысты материалдар оның тұрғылықты жері бойынша сотқа жіберілді.
Мекеме әкімшілігіне мұндай бұзушылықтардың қайталануына жол бермеу туралы ресми нұсқама тапсырылды. Сондай-ақ, алдын алу және ұйымдастыру шараларын күшейту қажеттігі көрсетіліп, қайталанған құқықбұзушылықтар үшін жеке жауапкершілік түсіндірілді.
