АҚШ-пен келіссөздерге Ресей тарапынан кім қатысады?

«Forbes» басылымының жазуынша, Ресей президенті Владимир Путин алда болатын келіссөздерге «аса ауыр салмақтағы» саяси кадрлерден команда жасақтап жатыр.

Басылым дерегінше Ресей келіссөзшілерінің құрамы былай:

Юрий Ушаков – Ресейдегі кәрісүйек саясаткерлердің бірі. Жасы – 77-де. Ресейбасы Путиннің ескі досы әрі РФ Президентінің көмекшісі. Кремльдің сыртқы саясат мәселелеріне жауапты тұлға. 10 жыл АҚШ-та елші болған. Ресей Сыртқы істер министрлігін басқарған адам.

Сергей Нарышкин – Ресейдің Сыртқы барлауын басқарады. Нарышкин де жас емес. 70-тен асып барады. Президент Путинмен 80-ші жылдары КГБ-да қызметте жүріп танысқан. Содан бері бірелі ажырамай келеді.

Кирилл Дмитриев – РФ Тікелей инвестиция қорының басшысы. Ресейлік келіссөзшілердің ішіндегі ең жасы осы (49-да). Өзі Киевтің тумасы.

«Стэнфорд пен Гарвардта білім алған қаржыгер Дмитриевке келетін болсақ, ол келіссөздерде «бейресми байланыс арнасы» ретінде маңызды рөл атқара алады», - деп жазады «Bloomberg». 

Сергей Лавров – Ресейдің СІМ басшысы. 74 жастағы бұл Сергей Ресей саясаткерлерінің ішіндегі ең мәшһүрі. Ол Ресей Сыртқы істер министрлігін басқарған жылдары Ресейде 8 премьер-министр ауысқан екен. Ол Ресей СІМ-ін 2004 жылдан бері тізгіндеп келеді.

Сарапшы Нұргелді Әбдіғанидің айтуынша, бұл тізімдегі Ушаков пен Нарышкин 2022 жылы соғыс басталғаннан кейінгі алғашқы келіссөздерге қатысқан. 

АҚШ келіссөзшілерінің құрамында Мемлекеттік Хатшы Марко Рубионың, ЦРУ директоры Джон Рэтклиффтің, Ұлттық қауіпсіздік бойынша кеңесші Майкл Уолтцтың және арнайы өкіл Стив Уиткофф аттары аталады. Сондай-ақ, аталған кездесуге АҚШ-тың Украина-Ресей бойынша арнайы өкілі Кит Келлог те қатысуы мүмкін деп күтіледі. Әзірге Украинадан келіссөзшілер құрамында кімдер болатыны ашық айтылмады, - дейді сарапшы.

Иллюстрация: vchal/istockphoto.com