АҚШ-тың бұрынғы президенті Джо Байден жоғары лауазымынан кеткеннен кейін алғаш рет ашық мәлімдеме жасады, деп хабарлайды Malim.kz.
Ақ үйдің экс-басшысы Дональд Трамп әкімшілігінің саясатын қатаң сынға алды. Байденнің сөзін тікелей эфирде америкалық ABC телеарнасы көрсетті.
«100 күнге жетпейтін уақыт ішінде бұл әкімшілік соншалықты көп зиян келтіріп, бүлдіргені — таңғаларлық. Мұндай өзгерістер осыншалықты тез орын алуы мүмкін екені шын мәнінде сұмдық», – деді Байден Чикагода мүмкіндігі шектеулі жандардың құқығын қорғау конференциясында.
«Біз ешқашан дәл қазіргідей бөлінген емеспіз», – деп қосты ол.
82 жастағы саясаткер дауысын зорға шығарып, кейде кідіріп сөйледі.
AFP агенттігінің жазуынша, экс-президенттің кейде «жасына байланысты белгілері» қатты байқалады, бұл оның сайлауалды науқаннан бас тартуына түрткі болған.
Агенттік Байденнің экспромт әзілдерді айтуда қиындық көргенін, әрі жиі «қалай десем екен...» деген сөз-паразитке сүйенгенін атап өтті.
Экс-президент Трамптың атын атамай, оны «ана жігіт» деп қана сипаттаған.
Фото: Nam Y. Huh/AP Photo/picture alliance
