Ливандық «Хезболла» қарулы тобының жүздеген мүшесі өздері қолданып жүрген пейджерлерінің жарылуы салдарынан жарақат алды. Бұл туралы Би-би-си жазды.
Жарылыстарды бейнебақылау камераларына түскен кадрлардан көруге болады. Бір кадрда пейджер сауда үйінде жүрген адамның қалтасында жарылған.
Ливан билігі жарылыс салдарынан 9 адам қаза тауып, 2750 адам жарақаттанғанын растады. Олардың ішінде 200 адамның жағдайы өте ауыр.
«Хезболла» екі жауынгерінің және 8 жастағы қыз баланың қаза тапқанын хабарлады. AFP агенттігінің мәліметі бойынша, ол - осы ұйымдағы адамның қызы.
Жарақат алғандардың қатарында «Хезболла» жауынгерлері мен медицина қызметкерлері, сондай-ақ Иранның Ливандағы елшісі де бар. Иран телеарнасының ақпараты бойынша елші жеңіл жарақаттанған.
Ливанның мемлекеттік ақпараттық агенттігі жарылыстардың көбі негізінен Бейрут астанасының оңтүстік ауданында болғанын хабарлады.
Ливанға көршілес Сирия елінде де бірнеше пейджер жарылған екен. Сирия астанасы Дамаск қаласында және оның маңындағы елді мекендерде 14 адам зардап шеккен. Олардың қай елдің азаматтары екені әлі белгісіз.
Сондай-ақ пейджерге 10-20 граммдық күшті жарылғыш зат салынған деген ақпарат бар. Сарапшылардың пікірінше, жарылғыш заттарды жалған электронды бөлікке жасыруы мүмкін. Бұдан кейін арнайы әріптік-цифрлық хабарлама арқылы іске қосылады.
Би-би-си тілшісінің хабарлауынша, пейджерлердің 1%-дан төмені ғана өлімге себепші болған, дегенмен жүздеген адам ауыр жарақат алды, сондықтан бұл «Хезболла» үшін айтарлықтай психологиялық соққы болды.
Фото: bbc.com
Байланысты жаналықтар
MalimBlocks
