Трамп Ресейден басқа 185 елге баж салығын енгізбек

АҚШ президенті Дональд Трамп шетелден әкелінетін барлық тауарға баж салығы енгізілетінін жариялады, - деп хабарлайды Мalim.kz тілшісі dw-ге сілтеме жасап. 

Импорттық өнімге АҚШ әкімшілігі өзара іс-қимыл принципі бойынша кедендік баж салатын 185 мемлекеттің тізімін Дональд Трамп Truth Social желісіндегі парақшасында жариялады.

АҚШ президенті Дональд Трамп шетелден әкелінетін барлық тауарға 10% баж салығын енгізетінін жариялады. Кейбір елдер үшін бұл көрсеткіш одан да жоғары болды: Қытай – 34%, Еуроодақ елдері – 20%. Қазақстанға салынатын баж салығы 27% деңгейінде белгіленді. Ал Ресей бұл тізімге кірмеді.

Импорттық тарифтер туралы жаңа шешім

Трамп сәрсенбі, 2 сәуір күні Ақ үйде өткен баспасөз мәслихатында бұл шешімін ресми түрде мәлімдеді.

"АҚШ-қа қатысты қандай сауда саясаты жүргізілсе, біз де солай жауап береміз. Бұл – Америка тарихындағы ең маңызды күндердің бірі", - деді ол. 

Ақ үй кейіннен әлеуметтік желідегі ресми парақшасында әр елге қатысты баж салығының пайыздық мөлшерін жариялады:

Қытай – 34%

Еуроодақ елдері – 20%

Швейцария – 31%

Израиль – 17%

Қазақстан – 27%

Вьетнам – 46%

Камбоджа – 49%

Лаос – 48%

Ұлыбритания, Бразилия, Аргентина, БАӘ, Украина – 10%

АҚШ-қа автокөлік импорттауға жаңа баж салығы

Трамп сондай-ақ 3 сәуірден бастап елге әкелінетін кез келген автокөлікке 25% баж салығы енгізілетінін растады. 3 мамырдан бастап автокөлік бөлшектеріне де қосымша тарифтер қолданылады. АҚШ президентінің айтуынша, бұл шара "ұлттық қауіпсіздікке төнген қатердің" алдын алуға бағытталған.

Фото: White House / Flickr