Ресей мен Украина әскери тұтқындармен алмасып, бір-біріне 175 адамнан тапсырды. Бұл туралы 19 наурызда Ресей Қорғаныс министрлігі хабарлады.
Министрліктің мәліметінше, бұдан бөлек, Киевке шұғыл медициналық көмекке мұқтаж Украина Қарулы Күштерінің 22 ауыр жараланған сарбазы берілген.
Айта кетейік, кеше Ресей президенті Владимир Путин Ақ үй басшысы Дональд Трамппен телефон арқылы сөйлескеннен кейін, Мәскеу «ізгі ниет белгісі» ретінде Украинаға 23 жаралы украиналық әскери қызметкерді жіберетінін уәде еткен еді.
РФ Қорғаныс министрлігі ресейлік әскери қызметкерлердің Беларусь аумағында екенін нақтылады.
Кейінірек Украина президенті Владимир Зеленский бұл алмасудың болғанын растап, оны «соғыс басталғалы бері ең көп адам алмасқан жағдай» деп атады. Ол үйіне оралған украиналықтар арасында «ауыр жараланғандар мен Ресей ойдан шығарған қылмыстары үшін қудалаған жауынгерлер» бар екенін айтты.
«Барлығына қажетті медициналық және психологиялық көмек шұғыл түрде көрсетіледі», – деді Зеленский.
Фото: UKRAINIAN PRESIDENTIAL PRESS/REUTERS
