АҚШ президенті Дональд Трамп Ресей Қарулы Күштерінің 24 сәуірге қараған түні Киевке жасаған соққыларына байланысты Ресей президенті Владимир Путинге үндеу жасады. Бұл туралы ол Truth Social әлеуметтік желісіндегі парақшасында жазды, деп хабарлайды Malim.kz.
«Мен Киевке жасалған ресейлік соққыларға наразымын. Мұның қажеті жоқ еді, әрі бұл өте орынсыз уақытқа тұспа-тұс келді. Владимир, тоқта! Аптасына 5000 сарбаз қаза тауып жатыр», – деп мәлімдеді АҚШ басшысы.
Сондай-ақ Трамп тараптарды бейбіт келісімге келуге шақырды.
«Келісімге келейік», – деді ол.
Бұған дейін Дональд Трамп Украина президенті Владимир Зеленскийдің Қырымды Ресейге беру туралы ұсынысқа келіспегенін сынға алған болатын. Бұл ұсыныс – америкалық Axios басылымы таратқан ақпарат бойынша, Парижде өткен келіссөздер барысында Украина делегациясына ұсынылған құпия бейбіт жоспардың негізгі тармақтарының бірі болған.
Еске салайық, 24 сәуірге қараған түні Ресей қарулы күштері Киевке баллистикалық зымырандар мен дрондар арқылы шабуыл жасаған болатын. Киев мэрі Виталий Кличконың Telegram-дағы жазбасына сәйкес, соққы салдарынан кемінде 8 адам қаза тапқан, 77 адам жараланып, медициналық көмекке жүгінген. Шабуылдан 12 тұрғын үй зардап шеккені хабарланды.
Фото: Brendan Smialowski/Maxim Shemetov/AFP/Getty Images
