Алматы-Өскемен трассасында, Сарқан маңында болған жол-көлік оқиғасы салдарынан төрт адам көз жұмып, тағы төрт адам ауруханаға түсті, деп хабарлайды Malim.kz Taldykorganec сайтына сілтеме жасап.
Жетісу облыстық полиция департаментінің мәліметінше, екі автокөлік соқтығысқан апат 10 желтоқсан күні шамамен 14:15-те болған.
Алдын ала деректер бойынша, KIA көлігінің жүргізушісі қолайсыз ауа райы — боран, көктайғақ және көрінудің шектелуі кезінде — қарсы бағытқа шығып кетіп, Toyota автокөлігімен соқтығысқан.
Полиция қаза болғандардың туыстары мен жақындарына шынайы көңіл айтады.
Ведомство барлық жүргізушілерді жол жүру ережелерін, жылдамдық режимін және жолаушыларды тасымалдау кезіндегі қауіпсіздік талаптарын қатаң сақтауға шақырды.
«Жол ережесінің болмашы бұзылуының өзі қайғылы және орны толмас жағдайларға әкелуі мүмкін», — деді полиция департаменті өкілдері.
