КазТАГ ақпарат агенттігінің бас редакторы Әмір Қасенов Астанада ұсталды, деп хабарлайды Malim.kz агенттік тілшісіне сілтеме жасап.
«Бүгін сағат 19:00-де Астанадағы Есіл аудандық полиция басқармасына тергеу әрекеттеріне шақырылған КазТАГ бас редакторы Әмір Қасеновтің адвокаттары оның ұсталғанын хабарлады. Мұны құқық қорғау органдары мен тапсырыс берушілер — Тимур Турлов пен Freedom Finance тарапынан жасалған құқықтық бассыздық деп санаймын. Егер Қазақстанда әділдік бар болса, Әмірге тағылған барлық айып алынып, ол бостандыққа шығуы тиіс!» — деп жазды агенттіктің бас директоры Әсет Матаев өзінің Telegram-арнасында.
Адвокат Рена Керимованың айтуынша, Қасеновті ұстау – Қылмыстық кодекстің 274-бабының 3-бөлігі бойынша (орташа ауырлықтағы қылмыс, санкциясы 5 жылға дейін бас бостандығынан айыруды көздейді) тағылған айып үшін шамадан тыс қатаң шара.
«Бұл құқық қорғау органдарының психологиялық қысым мен заңсыз тергеу тәсілдері туралы жасалған мәлімдемелерге берген жауабы сияқты әсер қалдырады. Тергеу соты бұл жағдайға тиісті құқықтық баға беріп, қамауға алу санкциясын мақұлдамайды деп үміттенемін», — деді адвокат.
