«Ақ Жайық» басылымы Атыраудағы Қонаев атындағы BINOM мектебінде сегізінші сынып оқушысына жасалған шабуылдың мән-жайын анықтады, деп хабарлайды Malim.kz.
Еске салайық, оқиға 13 наурыз күні болған. Тоғызыншы сынып оқушысы сегізінші сыныпта оқитын қызды пышақпен жарақаттап, салдарынан оқушы ауруханаға жеткізілді. Дәрігерлер оның жағдайын орташа ауыр деп бағалады.
Тергеу барысымен таныс дереккөздің айтуынша, тоғызыншы сынып оқушысынан жазбалары бар жеке күнделік табылған.
Ондағы жазбалардан оқу орындарындағы зорлық-зомбылық пен шабуыл тақырыптарына қызығушылық байқалады, сондай-ақ әртүрлі елдерде болған осындай оқиғалар сипатталған.
Жасөспірімнің заттарын тексеру кезінде тергеушілер оның мектеп сөмкесінен бірнеше пышақ пен балта тапқан.
Тергеу нұсқасына сәйкес, оқушы тек бір қызға ғана емес, басқа адамдарға да шабуыл жасауды жоспарлаған болуы мүмкін.
Дереккөздің мәліметінше, ол қызды өлтірмек болған, ал оған қыздың кездейсоқ жымиғаны себеп болған. Зардап шеккен қыздың арқасынан сегіз жарақат тіркелген.
Сондай-ақ жасөспірімнің жазбалары, хат алмасуы және араласатын ортасы тексеріліп жатыр.
Дереккөздің айтуынша, бұған дейін ол құқық қорғау органдарының назарына іліккен. Сол кезде тексеру оның өзіне де, отбасына да қатысты жүргізілгенімен, іс кейін жабылған.
Аталған дерек бойынша қылмыстық іс қозғалды. Күдікті ұсталып, тергеу әрекеттері заңды өкілдерінің қатысуымен жүргізілуде.
