Атырау облысының прокуратурасы Жангелдиндегі отбасыны өлтіру ісі бойынша жаңа мәліметтерді жариялады, деп хабарлайды Malim.kz «Ақ Жайыққа» сілтеме жасап.
Тергеу мәліметінше, отбасы мүшелерінің өлтірілуі бір мезетте емес, әртүрлі уақытта жасалған. Алғашқы және кейінгі қылмыс аралығында бірнеше ай өткен. Атырау облысы прокуратурасының дерегіне сәйкес, күдікті Наурыз Мұқанғалиеваны мамыр айында, ал отбасының қалған үш мүшесін қараша айында өлтірген.
Тергеу нұсқасы бойынша, қылмыс үшінші тұлғалардың қатысуынсыз, жалғыз өзі жасалған. Сот-психиатриялық сараптама қорытындысына сәйкес, Сұлтан Сәрсемалиев есі дұрыс деп танылып, өз әрекеттері үшін жауап бере алады.
Атырау облысы прокурорының көмекшісі Жандар Болатбектің айтуынша, қаза тапқандардың денесінде ас үй пышағымен салынған көптеген пышақ жарақаттары анықталған.
«Әрқайсысында алты және одан да көп жарақат бар: кеуде тұсы, мойын және өмірлік маңызды ағзаларға тиген», - деді ол.
Күдіктінің бұрынғы жұбайы әрі қаза тапқандардың қызы Ақбаян Мұқанғалиеваға қатысты әзірге түпкілікті қорытынды жасалған жоқ. Атырауда мамандар оның психикалық жағдайына нақты баға бере алмағандықтан, Алматы қаласында қайта сот-психиатриялық сараптама тағайындалған. Қаза тапқандардың туыстары сот процесінің ашық өтуін талап етіп, барлық мән-жай сотта жария болады деп үміттеніп отыр.
Қылмыстық іс мамыр айында сотқа жолдануы мүмкін. Тергеу жалғасып жатыр.
