Шымкентте 500 балаға арналған жаңа Оқушылар сарайы ашылды
Онда балалардың қосымша білім алуына барлық жағдай жасалған
Шымкентте Тұран шағын ауданындағы Оқушылар сарайы қолданысқа берілді. Жалпы ауданы 9 881,9 шаршы метр құрайтын үш қабатты ғимарат 1 аусымда 500 орынға лайықталған, деп хабарлайды Malim.kz.
Заманауи талапқа сай бой көтерген жаңа нысанды аралап көрген қала әкімі өскелең ұрпақтың сапалы білім, саналы тәрбие алуына қолайлы жағдай жасау басым бағыттардың бірі екенін атап өтті. Сондай-ақ, жауаптыларға жастардың бос уақытын тиімді ұйымдастыруды тапсырды.
Қала әкімі баспасөз қызметінің мәліметінше, жаңа қосымша білім беру мекемесінде 7 жастан 18 жасқа дейінгі балалардың қосымша білім алуына барлық жағдай жасалған.
Оқушылар үшін бассейн, интерактивті кітапхана, керамика үйірмесі, 3D-модельдеу және Lego кабинеттері қарастырылған. Биотехнологиялық және гуманитарлық блоктарда балалардың шығармашылық қабілеттерін дамытуға ықпал ететін фотостудия, бейне студия және журналистика үйірмелері орналасқан.
Фото: Шымкент қаласы әкімінің баспасөз қызметі
