Бердіқұлов мектебінің түлектері

Биыл белгілі қаламгер, көр­некті көсемсөз шебері, қазақ спорт журналистикасының негізін қалаушы Сейдахмет Бердіқұловтың туғанына 90 жыл. Осыған орай, «Egemen Qazaqstan» газетінің редакциясында Ақпарат және қоғамдық даму министрлігінің ұйымдастыруымен  «Сейдахмет Бердіқұлов мұрасы және қазіргі журналистика» атты шара өтті. 

«Egemen Qazaq­stan»-ды әр жылдары басқарған Са­уытбек Абдрахманов, Уәли­­хан Қалижанұлы, танымал қаламгерлер Жарылқап Бей­сенбайұлы, Жан­болат Аупбаев, Қуаныш Жиен­бай, Бауыржан Омаров, Қыдырбек Рыс­бектер мазмұнды әңгіме шертіп, ойларын ортаға салды.

Сауытбек Абдрахманов Сейдахмет Бердіқұловтың бұрынғы одақ көлемінде мойындалған спорт журналисі екеніне айрықша тоқталды.  Футболдың феноменін, қа­дір-қасиетін қазаққа алғаш түсіндіріп берген де – сол кісі. Әсі­ресе қазақ жастарының бойына намысшылдықты ету тұрғысынан ерекше еңбек етті деп жылы лебізін білдірді.

Ж.Бейсен­байұлы Бердіқұловтың идеяшылдығына ерек­ше маңыз бере сөйледі. У.Қалижанұлы қаламгердің ұйымдастырушылық қасие­тіне кеңірек тоқталып өтті. Ал Ж.Ауп­баев Сей­дағаңның «Лениншіл жастың» редакциясында түрлі кездесулер ұйымдастыруға ұйытқы болғанын айтты. Сөзіне мысал ретінде Ла Скаладан келген Амангелді Сембинмен, антрополог Ноэль Шаяхметовпен, түр­кітанушы Иштван Қоңыр­мен, алты құрлықтың бесеуіне аяғы тиген жазушы Әнуар Әлім­­жановпен болған кезде­су­лерді сөз етті.

Қ.Жиенбай қаламгердің көп­шілікке беймәлім адами қа­сиеттері туралы ой қозғаса, шә­кірт­тері Б.Омаров пен Қ.Рыс­бек абзал ағалары хақында қызықты ес­те­ліктер айтты.

– Редактор ретінде Сей­дахмет Бердіқұлов тәртіп пен қағидаттың адамы еді. Аса жауапты кезде ол талай қаламгерге қорған бола білді. Оның мектебінің журналистика тарихында айрықша орны бар, – деп сөзін түйіндеді Бауыржан Омаров.

– Бүгінде «Қазақ газеттері» болып қайта жаңғырғанымызды көзіқарақты көпшілік жақсы біледі. Оның құрамында бір­неше басылым бар. Соның бірі – «Ұлан» газеті. Бұл – бұ­рынғы «Қа­зақстан пионері». Сейдахмет Бер­діқұлұлы кезінде дәл осы басылымды басқарған. Сондықтан қаламгердің мерейтойы бәрімізге ортақ. Бүгінгі дөңгелек үстел журналистер қауымы үшін шеберлік сыныбы болды, – деді «Қазақ газеттері» ЖШС бас директоры Дихан Қамзабекұлы.