«Енді сахнаға ұялмай шығамын»: Майра Мұхамедқызы Халық әртісі атағын ұзақ күткенін айтты

Атақты опера әншісі Майра Мұхамедқызының еңбегі ақталып, күні кеше Қазақстанның «Халық әртісі» атағына ие болды. Өнер иесі бұл атақты былтыр береді деп күткенін жасырмады, деп хабарлайды Malim.kz.

«Жақсылықтың ерте-кеші жоқ қой. Халық маған «Халық әртісі» атағын баяғыда беріп қойған. Қолымда тек сол қаулы, сертификаты ғана болған жоқ қой. Сондықтан бүгін Үкімет соны беріп, жарлық шығарып жатқанына мен өте бақыттымын. Әлемнің сахнасында Қазақстанның халық әртісі деген атқа лайық өнер көрсетіп-ақ жүрмін ғой. Енді сахнаға ұялмай, қысылып-қымтырылмай шығатын болдым. Әрине, күттім. Әсіресе, былтыр қатты күткен едім. Өйткені, «Қазақстанның халық әртісі» атағын орнына қайта қойды ғой. Сол кезде беріледі деп тізімде менің де атым жүрді. Бірақ маған берілген жоқ. Сонда жылап қалдым», - дейді әнші Qaz365.kz тілшісіне берген пікірінде.

Айта кетейік, ҚР еңбек сіңірген әртісі, «Құрмет», «Отан» ордендерінің иегері, «Тарлан» сыйлығының, ҚР Мемлекеттік сыйлығының лауреаты, Париждегі «Гранд Операның» Қазақстаннан шыққан тұңғыш әншісі.

Ол 1969 жылы 9 мамырда ҚХР-да дүниеге келген. Бейжің Ұлттар Университетінің Музыка Факультетін (Джоу Бен Чин сыныбы) және Пекин Консерваториясын (Го Шу Джен сыныбы) бітірген.