Жазушы Кәрім Мәсімовтің 4 кітабы. Біреуі тіпті құпия...

ҰҚК Төрағасы К. Мәсімов Қазақстан Тәуелсіздігінің 30 жылдығы қарсаңында кітаптар шығатынын осы мекеменің сайты мәлімдеді.

«Комитет Төрағасы генерал-лейтенант Кәрім Мәсімовтің жалпы редакциясымен «Отандық арнаулы қызметтің хроникалары. Адамдар, оқиғалар, фактілер туралы хикаялар», «Мемлекеттік шекара» кітаптары басылымға дайындалды. Кітаптар ұлттық қауіпсіздікті қамтамасыз ету және мемлекетіміздің шептерін қорғау ісіне лайықты үлес қосқан жедел қызметкерлер мен шекарашылардың қызметі туралы баяндайды.

Басылымдарға қазіргі уақытта құпиясыздандыруға болатын жайттар ғана енгізілді. Оның негізінде – нақты адамдар, оқиғалар мен фактілер, олар оған тікелей қатысушылардың эмоциясын жеткізетін қатаң деректі стильде мазмұндалған. Кітаптар өз оқырмандарын табады деп ойлаймыз» делінген хабарламада.

Сайт хабарламасында жазушы К.Мәсімовтің өз редакциясымен басылып шығып жатқан кітаптарына қатысты қазақша қиналып айтқан толғамын да беріпті. Онысын төменде назарларыңызға ұсына кеткенді де жөн көрдік. Жалпы, енді шенеунік, бизнесмен Кәрім Мәсімовті кәсіби жазушы қатарына қосып, оны Жазушылар одағына қабылдай беруге де болатын шығар. Олай дейтін себебіміз, К. Мәсімов бұған дейін жасанды интеллект туралы «Следующий властелин мира» атты кітап жазып тастаған. Мұндай тақырыптағы еңбекті 700-ден астам жазушысы бар Жазушылар одағынан осы күнге дейін жазбаған. Оны бұйым көрмесеңіз, Кәрім Мәсімовтің «Ахмет. Ұлт Ұстазы» атты кітабы және бар. Әрине, қазақта ахметтанушы көп. Бірақ, сол көптің бәрі бір Мәсімовке жетпей тұр. Неге десеңіз, биыл Ахмет Байтұрсынұлы туралы телехикая түсіріп жатыр. Сол телесериалды түсірушілер К.Мәсімовтың кітабынан ғана сүйеніп, сол кітаптың желісімен ғана жүріп келеді. Ал мұндай құрмет Жазушылар одағындағы жеті жүз жазушының біріне де бұырмаған. Бір қызығы, К.Мәсімов Ахмет Байтұрсынұлы туралы кітабын 2011 жылы шығарып тастаған. Көп қазақ ондай кітаптың барын мұнда ғана білді. Қолдарына күндіз шам алып, сол кітапты іздеп-ақ жүр. Бірақ, Мәсімовтің кітабы таптырмайды.