Германиялық ғалымдар танымал "Дубай шоколадына" қатысты талдау жүргізіп, оның көшірмелері ағзаға зиян екенін анықтаған, - деп хабарлайды Malim.kz тілшісі.
24kz мәліметінше, көшірме құрамында зиянды заттардың бірнеше түрі бар. Осыдан кейін тәттіні Еуроодаққа тасымалдау тәртібі қатаңдатылды. Тек түпнұсқасын шекарадан өткізуге рұқсат берілген.
Дубайлық кондитер Сара Хамуда ойлап тапқан шоколад әлемде әлі аса танымал. Әмірліктен оны арнайы тапсырыс беріп алатын адам көп. Дегенмен, атауы бір болғанымен, құрамы өзгеше шоколадқа тап болатындар да аз емес. Осы күні тәттіден ағзаға зиян заттар анықталып отыр. Кей саудагерлердің жасырын маркетингтік қадамынан туристер зардап шеккен.
"Біріккен Араб Әмірліктері мен Түркиядан алып келген 8 шоколадқа тексеріс жүргізілді. Соның алтауында өсімдік және пальма майы өндірісінде қолданылатын химиялық қоспалар табылды. Әсіресе, Әмірліктен жеткізілген өнімдерде шамадан тыс мөлшері анықталды. Оған қоса, глицидил эфирі де бар болып шықты", - дейді Штутгарт химиялық зерттеулер басқармасы.
Осыдан кейін Германия тарапы тәтті десерттің шекара асуына біршама шектеу енгізді. Жалған тауар белгісін қолдануға мүлде тыйым салынды. Түпнұсқаны тек белгілі бір мөлшерде тасымалдауға рұқсат. Жалпы Дубайда кондитерлік өнімге сұраныс аса жоғары емес. Тұрғындар арасында дәмін татып көрмегендер де бар.
Фото: KatMoys / Shutterstock / Fotodom
MalimBlocks
