Мектептерде жаңа оқу жылынан бастап фастфуд сатылмайды
Денсаулық сақтау министрі Ақмарал Әлназарова үкіметтегі баспасөз конференциясы кезінде мектептердегі тамақ сапасына қатысты сұраққа жауап берді, деп хабарлайды Malim.kz.
БАҚ өкілдері министрден жаңа оқу жылында мектеп асханаларында фастфуд сатылатынын не сатылмайтынын сұрады.
«Жоқ. Қатаң шектеу бар: мектеп буфеттерінде, соның ішінде сіз айтып отырған тез қорытылатын көмірсулар — гамбургер, чебурек сияқты фастфуд түрлері — асханаларда сатылмайды», — деді Ақмарал Әлназарова.
Бұл шектеу шоколад батончиктері мен тәтті газды сусындарға да қатысты. Өзгерістер 2025 жылғы 1 қыркүйектен бастап күшіне енеді.
Еске салсақ, өткен жылы ауыл шаруашылығы қызметкерлері форумында сөйлеген сөзінде Президент Қасым-Жомарт Тоқаев мектеп асханаларындағы тамақ сапасына қатысты пікір білдіріп, балаларға берілетін тамақтың сапасына үлкен көңіл бөлу қажет екенін айтқан болатын.
Кейін премьер-министр Олжас Бектенов Оқу-ағарту және Денсаулық сақтау министрліктеріне жыл соңына дейін сарапшылар мен ғалымдарды тарта отырып, мектеп асханасы жоқ оқу орындарын да қамтитын бірыңғай ас мәзірі мен стандартты тамақтану тәртібін бекітуді тапсырған.
Фото: pixabay
Ең көп оқылған
