Эвиан-ле-Бен қаласында өткен саммит қорытындысы бойынша жарияланған мәлімдемеде «Үлкен жетілік» (G7) елдерінің көшбасшылары Ресейдің мұнай және газ секторына қарсы жаңа санкциялар енгізу туралы келіскені айтылды, деп хабарлайды Malim.kz.
Құжатта Мәскеуге қарсы жаңа шектеулер енгізудің «қолайлы сәті туғаны» атап өтілген. Себебі Дональд Трамп Иранмен Ормуз бұғазын ашу жөнінде келісімге қол жеткізген. Бұл бұғаз арқылы мұнай мен газдың ірі көлемі тасымалданады.
Сонымен қатар G7 елдері Украинаның соңғы айларда майдандағы жетістіктерін атап өтті. Осы қарқынды қолдау және күшейту мақсатында көшбасшылар Украинаға әуе шабуылына қарсы қорғаныс жүйелерін, зымырандарды тосып қалатын құралдарды, алыс қашықтыққа арналған және өзге де қару-жарақ түрлерін жеткізу көлемін арттыруға келісті.
Бұдан бөлек, G7 елдері Украинаға өз аумағында әскери өнім өндірісін ұлғайтуға мүмкіндік беретін лицензиялар беру мәселесін қарастыруға уәде етті.
Сондай-ақ ұйым Украинаға алдағы қыс мезгілінде энергетика саласында қолдау көрсететінін мәлімдеді.
