Ұлттық валютаның күрт құнсыздануы мен инфляцияның өсуіне байланысты басталған наразылықтар мен ереуілдер Иранда үшінші күн қатарынан жалғасып жатыр, деп хабарлайды Malim.kz.
Наразылықтар тек астанамен шектелмей, елдің бірқатар өзге қалаларын да қамтыды.
Хабарламада иран риалының бағамы рекордтық төмен деңгейге түскеннен кейін ел бойынша наразылық шаралары үшінші күнге ұласқаны айтылған.
Акциялар жексенбі күні Тегерандағы Үлкен базар саудагерлерінің ереуіл жариялауынан басталған. Бұған ашық нарықта иран риалының АҚШ долларына шаққандағы бағамының тарихи минимумға дейін төмендеуі себеп болған.
BBC Persian дерегіне және әлеуметтік желілерде тараған бейнежазбаларға сәйкес, демонстрациялар Кередж, Хамедан, Кешм, Маллард, Исфахан, Керманшах, Шираз және Йезд қалаларында өткен. Полиция наразылық білдірушілерді тарату үшін көзден жас ағызатын газ қолданғаны хабарланды.
Иран билігі елде наразылық көңіл күйі бар екенін мойындап, азаматтардың талап-тілектерін, тіпті өткір сын айтылған жағдайда да, сабырмен тыңдауға дайын екенін мәлімдеді.
Осы жағдай аясында Дональд Трамп Иранда билік ауысуын қолдай ма деген сұраққа тікелей жауап беруден бас тартқанын айтты. Сонымен бірге ол елде «орасан зор инфляция» мен ауыр экономикалық дағдарыс қалыптасқанын атап өтті. Трамп Иран баллистикалық зымырандар немесе ядролық қару бағдарламаларын қайта жандандыратын болса, **Израиль**дің жаңа әуе соққыларын қолдауы мүмкін екенін де жоққа шығармады.
