Ақтөбеде жеке компанияда бас есепші болып орналасқан 51 жастағы әйел 4 айдан соң компанияның қаражатын ұрлай бастаған. Ол анасының банк картасына бірнеше траншпен миллиондап теңге аударған. Ал есеп құжаттарында оны жеткізілген тауар үшін төленді деп көрсете берген. Бұл туралы «Диапазон» басылымы жазды, деп хабарлайды Malim.kz.
Осындай жолмен бірнеше ай ішінде ол компанияның шотынан 6 миллион теңге ұрлаған. Ал анасы қызының қаржылық айла-амалдары туралы білмегенін, тек несиесін өтеу үшін оған банк картасын бергенін айтқан.
Осы жағдайдаң соң ол сот үкіміне дейін келтірген залалдың жартысына жуығын өтеген. Бірақ бұл оны жазадан құтқармады.
Оның үстіне, биыл ақпанда ол мас күйінде және жүргізуші куәлігінсіз көлік жүргізгені үшін сотталғаны белгілі болған. Ол кезде бір жылға бас бостандығынан айырылған екен. Алайда кішкентай баласын тәрбиелеп отырғаны үшін жазасы кейінге қалдырылған.
Сеніп тапсырылған миллиондарды ұрлағаны үшін осы жазаны ескере отырып, сот оны 3 жылға бас бостандығынан айырған. Мұнда да жазасын бір жылдан кейін өтейтін болды. Өйткені, баласы 14 жасқа толуы керек.
Фото: niidpo.ru
