Ақтөбеде бүйрегін сатпақ болған ер адам сотталып кетті, - деп хабарлайды Malim.kz.
Ақтөбе қаласының № 2 сотында тірі адамның ағзалары мен тіндеріне қатысты заңсыз мәмілелер жасауға оқталды деген айыппен У.-ға қатысты қылмыстық іс қаралды.
Сотталушы У. 2024 жылғы маусымда тұрақты табыс көзі жоқ жұмыссыз болып, өзінің бір бүйрегін Telegram арна арқылы сататыны туралы хабарландыру жариялаған. Бір бүйректің құнын 9 000 000 теңгеге бағалаған.
2024 жылы қыркүйекте хабарландыруға құқық қорғау органдарымен байланыста болған куәгер Б. жауап берген. Олар У.-дан бір бүйректі сатып алу туралы келісімге келген. Қажет медициналық тексерістен өткеннен кейін сотталушы куәдан 5 000 000 теңге алған кезде ұсталды.
Сот отырысында сотталушы өз кінәсін толық мойындады.
У. ҚК-нің 24-бабының 3-бөлігі, 116-бабының 1-бөлігі бойынша кінәлі деп танылып, оған 1 жылға бас бостандығынан айыру түріндегі жаза тағайындалды. ҚК-нің 63-бабы ережелерін қолдана отырып, жазаның барлық белгіленген мерзіміне пробациялық бақылау тағайындаумен жаза тағайындалды, деп жазылған хабарламада.
Сот үкімі заңды күшіне енген жоқ.
Айта кетейік, 27 жастағы атыраулық бір бүйрегін 9 млн теңгеге бағалап, сатпақ болған жерінен ұсталған еді.
Фото: theopenasia.net
