Кәсіпкерлер Айша бибі кесенесі маңындағы ғимараттарды заңсыз иемденген

Кәсіпкерлерге "Ежелгі Тараз ескерткіштері" тарихи-мәдени мұражай-қорығы аумағында заңсыз иемденген ғимараттарды босату міндеттелді, - деп хабарлайды Malim.kz Жоғарғы соттың мәліметіне сілтеме жасап.

Іс бойынша не белгілі?

Іс материалдарына сәйкес, сотқа Айша бибі кесенесі қарасты мұражай-қорық талап арызбен жүгінген. Бұл мекемеге ерекше қорғалатын табиғи аумаққа жататын екі гектар жер берілген.

Мәселе неден шықты?

Aумақта бірнеше техникалық ғимарат салынған. Алайда бес кәсіпкер бұл нысандарды заңсыз иемденіп, оларды сауда жасау мақсатында пайдалана бастаған. Мұражай-қорық сотқа жүгініп, жауапкерлерде сауда қызметін жүргізуге рұқсат құжаттары мен ғимараттарды коммерциялық мақсатта қолдануға құқықтары жоқ екенін алға тартып, ғимараттарды босатуды талап етті. Сондай-ақ, тарихи-мәдени мұражай-қорық аумағында сауда жасауға тыйым салынғанын еске салды.

Жауапкерлер пікірі қандай?

"Төрт жауапкер талапты мойындамай, ғимараттардың 2010 жылы бір кәсіпкердің жеке қаражатына салынғанын және кейіннен сауда жүргізу үшін тегін берілгенін айтты. Бесінші жауапкер талапкердің талабымен келісті", – деп хабарлады Жоғарғы сот.

Сот шешімі

Жамбыл аудандық соты кәсіпкерлердің мұражай-қорыққа тиесілі ғимараттарды заңсыз иемденгенін анықтап, талапкердің пайдасына шешім шығарып, ғимараттарды босатуға міндеттеді.

Кәсіпкерлер апелляциялық шағым түсіргенімен, Жамбыл облыстық соты алғашқы инстанцияның шешімін өзгеріссіз қалдырды. Қаулы заңды күшіне енді, енді кәсіпкерлер заңсыз иеленген ғимараттарды босатуға міндетті.

Фото: Pixabay.com