Қазақстанға құны 1 триллион теңгеден асатын активтер қайтарылды
Бұл туралы Сыбайлас жемқорлыққа қарсы іс-қимыл агенттігі хабарлады
Биыл жыл басынан бері Сыбайлас жемқорлыққа қарсы қызмет аяқталған қылмыстық істер аясында шамамен 195 млрд теңге өндірген.
Соңғы 2,5 жылда олигополиялар тарапынан Қазақстан халқына 1,09 трлн теңге қайтарылды.
Бұған дейін Агенттік залалды өтеу ретінде Қайрат Сатыбалдыұлы қайтарған жылжымайтын мүлік объектілерін мемлекетке беру туралы хабарлаған еді.
Соның негізінде Алматы қаласындағы құны 7,9 млрд теңгеден асатын «Kaisar Tower» бизнес-орталығы Қазақ ұлттық қыздар педагогикалық университетінің меншігіне өтті.
Сонымен қатар, Т. Жүргенов атындағы «Қазақ ұлттық өнер академиясы» РММ теңгеріміне құны 800 млн теңгеден асатын әкімшілік ғимарат берілді.
Астанада құны 5 млрд теңгеден асатын үш зәулім сарай мүгедек балаларға арналған Астана қаласы әкімдігінің «Психологиялық-педагогикалық түзету кабинеті» КММ-ге табысталды.
Сонымен қатар, Австриядан 36,8 млрд теңге, Лихтенштейннен 116,7 млрд теңге, Түркиядан 2,2 млрд теңге, Біріккен Араб Әмірліктерінен 6,3 млрд теңге қайтарылды.
Бұдан басқа, лауазымдық өкілеттіктерін теріс пайдаланғаны үшін сотталған Индустрия және инфрақұрылымдық даму экс-вице-министрі Т. Тоқтабаевтан Қостанай облысындағы құны 5,6 трлн теңгеден асатын никель мен кобальттың ірі қорлары бар «Шевченковское» кен орны мемлекет меншігіне алынған.
Фото: pixabay
