ШҚО әкімдігі Риддердің экс-әкіміне қатысты түсініктеме берді
Оның 200 млн теңге жымқырғаны туралы ақпарат тараған еді
![](/images/article-img/1600/23226-1720852992-m.png)
ШҚО әкімдігі Риддер қаласының бұрынғы әкімі Дәулет Батырбаевтың ұсталғанына қатысты түсініктеме берді, деп хабарлайды Malim.kz.
Мұның алдында аталған азаматтың 200 миллион теңге жымқырып, күдікке алынғаны, Қаржылық бақылау агенттігі тергеу жүргізіп жатқаны туралы әлеуметтік желіде ақпарат тараған еді.
Соған байланысты ШҚО әкімдігі БАҚ сауалдарына жауап бере отырып, әкімдікте құқық қорғау органдарының азамат Д.Батырбаевты ұстағаны туралы ақпарат жоқ екенін хабарлады.
Ол азамат 3 ай бұрын Риддер қаласының әкімі қызметінен өз еркімен кеткен, яғни, 2024 жылдың сәуір айынан бастап Д. Батырбаев жергілікті атқарушы органда жұмыс істемейді, мемлекеттік қызметкер болып табылмайды, деп жазды облыс әкімдігінің баспасөз қызметі.
Сондай-ақ, Риддер қаласы әкімдігінің лауазымды тұлғаларына қатысты қандайда бір қылмыстық істер тіркелмегенін де атап өткен.
Фото: rudnyi-altai.kz