Түрмедегі Қуандық Бишімбаев немен айналысып жатыр?

Жұбайын аса қатыгездікпен өлтіргені үшін сотталған Қуандық Бишімбаев ең жоғары қауіпсіздік мекемесінде жазасын өтеп жатыр.

CMN.KZ ақпараттық агенттігінің хабарлауынша, елдің ең танымал экс-министрі үшін колонияда қолайлы жұмыс орны әлі табылмапты.

Қылмыстық-атқару жүйесі комитетіндегі редакцияның ресми сұрауына Бишімбаев әлі жұмысқа орналаспады деген жауап қайтарған.

- Бос жұмыс орындарының болмауына байланысты Қуандық Бишімбаев жұмысқа орналастырылмаған. Сотталған адамның күн тәртібі ҚАЖ мекемелерінің ішкі тәртіп ережелерінің және қолданыстағы Қылмыстық-атқару заңнамасының талаптарына сәйкес өтеді, - деп хабарлады ведомстводан.

Айта кетсек, шілде айында Орталық коммуникациялар қызметінде өткен брифингте ҚАЖК басшысы Теңізжан Жәнібеков Бишімбаевтың ағаш-металл өңдеуші болып жұмысқа тұра алатынын айтқан еді.

Қазір елордалық сотта Салтанат Нүкенованың бауырының Қуандық Бишімбаевқа қарсы талабы қаралып жатыр. Айтбек Амангелді әпкесін өлтірген адамнан моральдық және материалдық залал өтеуді талап етіп отыр.

Фото: /t.me/Jogargy_sot