Алматыда жүк көлігі 7 жасар қызды қағып кетті: автобус жүргізушісі жауапқа тартылды

Полицейлер Алматыда болған жол апатына қатысты автобус жүргізушісін жауапқа тартты. Жаяу жүргіншілер өткелінде қызды өткізбеген автобус жүргізушісі туралы сөз болып отыр. Бұл туралы ҚР ІІМ Әкімшілік полиция комитетінің төрағасы Қайсар Сұлтанбаев мәлімдеді, - деп хабарлайды Malim.kz тілшісі Massaget.kz-ке сілтеме жасап.

"Автобус өтіп кеткен, сондықтан қыз бір қадам шегінген. Осы кезде жүк көлігінің жүргізушісі оны көрмей қалған. Бәріңіз білесіздер, жүк көлігі биік. Шынында да, ол жүк көлігінің көрінбейтін жерінде болған. Жүргізуші оны байқамаған, сондықтан осындай  жағдай болды", - деді Қайсар Сұлтанбаев.

Қайсар Сұлтанбаев оқиға қала орталығында емес, жүк көліктеріне жүруге рұқсат етілген қала шетінде болғанын айтты.

Қазір қылмыстық іс қозғалған.

"Қылмыстық іс аясында барлығына баға беріледі, әрқайсы заң бойынша жауап береді. Кім кінәлі болса, ол осы жол апатына жауапты болады. Бірақ автобус жүргізушісі жаяу жүргіншілер өткелінде жаяу жүргіншіні өткізбегені үшін жауапкершілікке тартылды", - деді Сұлтанбаев.

Марқұм қыздың ата-анасы жауапқа тартыла ма? Бұл сауалға ІІМ өкілі жауап берді.

"Бұл жағдайда бала жол қозғалысы ережелерін бұзбай, жаяу жүргіншілер өткелі арқылы жолды кесіп өтті. Анасы қызды күтіп, жолдың қарама-қарсы жағында тұрған. (...) Қылмыстық іс шеңберінде ата-анасының жауапкершілігі қаралса, олар да жауапқа тартылады", - деді Сұлтанбаев.

Алматы Полиция департаменті әрбір адамның жауапкершілігі тергеу барысында тексерілетінін мәлімдеді.

"Сараптама тағайындалады, тіпті біреу емес, бірнешеу", - деп түсіндірді Алматы Полиция департаменті өкілі.

Еске салайық, бұған дейін Алматыда жүк көлігі жаяу жүргіншілер өткелінен өтіп бара жатқан жеті жасар қызды қағып кеткені, оқиға салдарынан бүлдіршін жан тапсырғаны хабарланды.

Әлеуметтік желіде оқиға орнынан қорқынышты кадрлар пайда болды.

Renault жүк көлігінің жүргізушісі Бұрындай көшесімен батыс бағытта келе жатып, Новая көшесімен қиылыста жаяу жүргіншілер өткелі бойымен жолдан өтіп бара жатқан жеті жасар қызды қағып кеткен.

Адам өліміне әкеп соққан жол апаты бойынша полиция қылмыстық іс қозғады.

Фото: Видеодан алынған кадр