Экс-министр Бекетаевтың ісі сотқа жолданды
Бұрынғы әділет министрі Марат Бекетаевқа қатысты тергеу аяқталды
Сыбайлас жемқорлыққа қарсы қызмет бұрынғы әділет министрі Марат Бекетаевқа қатысты тергеуді аяқтады, - деп хабарлайды Malim.kz тілшісі.
Астанада өткен брифингте Антикордың ресми өкілі Данияр Биғайдаровтың айтуынша, 3 наурызда қылмыстық іс сотқа жолданған.
"Сыбайлас жемқорлыққа қарсы қызмет бұрынғы әділет министрі Бекетаев пен басқа да тұлғаларға қатысты аса ірі көлемде жымқыру, алаяқтық және кәсіпкерлік қызметке заңсыз араласу деректері бойынша тергеуді аяқтады. 3 наурызда қылмыстық іс сотқа жолданды", – деді Биғайдаров.
Еске салайық, Марат Бекетаев 2023 жылғы қазанда ұсталған болатын. Былтыр Астана соты экс-министрдің қамауда ұстау мерзімін ұзартқанын хабарлаған еді.
Марат Бекетаевқа қатысты не белгілі?
Қазақ мемлекеттік заң институты заңгер мамандығы бойынша тәмамдады (1998). Лондон экономика және саяси ғылымдар мектебі (2000).
- 2001-2002 — Алматы қаласындағы Британ Кеңесінің құқықтық мәселелер жөніндегі консультанты, Қазақстан Республикасы Сыртқы істер министрлігінің "Дипломатиялық өкілдіктермен жұмыс жөніндегі департаменті" РМК-ның сектор меңгерушісі;
- 2002-2003 — Қазақстан Республикасы Сыртқы істер министрлігінің "Дипломатиялық корпусқа қызмет көрсету жөніндегі басқармасы" ЖАҚ бастығы ;
- 2003-2004 — Қазақстан Республикасы Мемлекеттік қызмет істері агенттігі төрағасының бөлім бастығы, басқарма бастығы, кеңесшісі;
- 2004 — Қазақстан Республикасы Мемлекеттік қызмет істері агенттігінің Ақпарат және тестілеу орталығы директорының орынбасары;
- 2004-2006 — Қазақстан Республикасы Мемлекеттік қызмет істері Агенттігінің "Мемлекеттік қызметшілерді оқыту Еуразиялық орталығы" РМҚК директорының орынбасары, директоры;
- 2006-2007 — Қазақстан Республикасы Премьер-Министрі орынбасарының кеңесшісі;
- 2007 — Қазақстан Республикасы Премьер-Министрінің кеңесшіс;
- 06.2007-04.2010 — Қазақстан Республикасының Әділет Вице-министрі;
- 04.2010-12.2015 — Қазақстан Республикасы Әділет министрлігінің Жауапты хатшысы;
- 11.12.2015-13.09.2016 — Қазақстан Республикасы Президенті Әкімшілігі Басшысының Орынбасары;
- 13.09.2016-11.01.2022 — Қазақстан Республикасының Әділет министрі;
2022 жылдың қаңтарынан — Қазақстан Республикасы Премьер-Министрінің кеңесшісі.
Фото: gov.kz
