Қазақстан шоколадын жарнамалаған ресейлік актер соққыға жығылды

Мәскеулік актер Егор Куликов Ресейге қайтып оралған соң, құқық қорғау органдары тарапынан қысым көріп, соққыға жығылғанын айтты. Оның сөзінше, бұл жағдайға Қазақстан шоколадына арналған әзіл-оспақ жарнамадағы рөлі себеп болған, деп хабарлайды Malim.kz kursiv.media-ға сілтеме жасап.

Куликов бұған дейін Ресейден жаппай мобилизация жарияланған соң кетіп, Алматыға көшкен. Сол жақта ол жарнамалық роликке қатысқан. Видеода Қазақстан шекарасында ресейлік релокантты атты жігіт қарсы алып, «еркіндік дәмі бар» шоколад ұсынады.

Біршама уақыттан кейін актер табыс табу үшін Ресейге қайта оралған. Алайда түсірілімнен қайтып келе жатқанда полиция оны тоқтатып, ұстап әкеткен. Бөлімшеде оны жалған ақпарат таратты деп айыптап, салдары ауыр болуы мүмкін екенін ескерткен. Бөлімнен шыққан соң белгісіз адамдар оған шабуыл жасап, ұрып-соғып, ауыр дене жарақаттарын салған. Куликов ауруханаға жеткізіліп, кейінірек: «Тірі қалдым, бірақ қатты зардап шектім», – деді.

Ауруханадан шыққан соң оның үйінде тінту жүргізілді. Құқық қорғау органдары оған елден шығуға тыйым салынғанын айтқан. Соған қарамастан, Куликов сол күні-ақ Ресейден шығып, АҚШ-қа өтіп кеткен.

Фото: youtube.com/@gromkieryby