10 балалы отбасы баспанаға зар болып отыр. Жахан Отарғалиев көмек сұрады
Атыраулық отбасы үй алу үшін халықтан көмек сұрайды.
Актер Жахан Отарғалиев 10 баласы бар әйелге көмек керегін айтып, халыққа үндеу жасады, деп хабарлайды Malim.kz.
Актер өзінің 15 жылдан бері әке атана алмай жүргенін айтып, әркімнің басындағы қиындық әртүрлі болатынын айтқан.
Менің бала аңсап жүргеніме 15 жыл болады екен. Мына кісілерде 10 бала бар. Әркімнің сынағы әртүрлі. 10 баласы бар отбасы бір баспанаға зәру.
Атырауға келу себебімнің бірі осы еді. Көп балалы отбасының баспаналы болуына сізбен біз болып атсалысайық! Үлкен қызы Ақжарқын оқу ақысын төлей алмаған соң оқудан шығып қалыпты. Егер оқу ақысын төлесе, оқуға қайта қабылданады екен. Сол үшін бір жылдық оқу ақысын өзім мойныма алдым. Біздің болашағымыз білімді жастар ғой. Бәрі жақсы болады, – деп жазды өнер иесі.
Ал көпбалалы ана бір айда 4 баспана ауыстырғанын жасырмады.
Басқаға бай болмасам да, балаға баймын. Жолдасымның ақшасы тек тамаққа кетеді. Жаңа киім де алып бермеймін. Бірінікін бірі киіп өсіп жатыр. Бірақ баспанамыздың болмауы жанға батады. Бір айда 4 үй алмастырдық. Көп балаға ешкім үйін бергісі келмейді. Өте қиын жағдайдамыз, – деп жылады батыр ана.
Фото: әлеуметтік желі
