Алматылықтар бүгіннен бастап жолақыны қымбаттатылған бағамен төлей бастады
Сондай-ақ, қолма-қол төлем болмайды
Алматыда бүгіннен бастап қоғамдық көліктегі жолақы 100 теңгеден 120 теңгеге қымбаттады, деп хабарлайды Malim.kz.
Қаладағы жолақының құны өсетіні әрі қолма-қол төлем алынып тасталатыны шілденің басында айтылған еді. Мұндай шешім себебін әкімдік қоғамдық көліктерге қажет бөлшектер мен керек-жарақ дүниелердің бағасының өсіп жатқанымен түсіндірген. Екінші жағынан соның есебінен тасымалдаушыларға бюджеттен берілетін субсидия мөлшерін азайту көздейтіндерін айтқан.
Сонымен қазір қаладағы айлық билет құны былай қалыптасты:
айлық жол жүру билеті – 9900 теңге;
студенттік айлық жол жүру билеті – 4200 теңге;
оқушылардың айлық жол жүру билеті – 2 мың теңге;
зейнеткерлердің айлық жол жүру билеті – 3 мың теңге.
Сонымен қатар, енді жол ақысы қолма-қол ақшамен төленбейді.
Жолаушылар жол ақысын Ebay филиалдарында және 115 тұтынушыларға қызмет көрсету орындарында сатып алатын көлік картасымен төлей алады. Одан бөлек, ұялы телефоннан SMS арқылы және мобильді қосымшамен төлейді.
Айта кетейік, қоғамдық көліктің жолақысы Астанада да өскен еді. Мұнда 1 тамыздан бастап жолаушылар 90 теңгенің орнына 110 теңге төлейтін болды.
Фото: Ж.Каримова, Vlast.kz
