Астанада маса мен шыбын-шіркейге қарсы өңдеудің үшінші кезеңі басталды
Әкімдік тұрғындардың өңделетін жерлерге бармай қоя тұруды сұрайды
«Астана дезинфекциясы» ЖШС 18 маусымда ашық орындарды – саябақтарды, гүлзарларды, көшелерді, тұрғын үй алаптарын өңдеудің үшінші кезеңін бастады, деп хабарлады Malim.kz.
Қала әкімдігінің мәлімдеуінше, дезинсекциялық шаралар толық жоюға емес, тітіркендіргіш жәндіктердің санын азайтуға бағытталған. Өйткені олар да табиғи экожүйенің ажырамас бөлігі.
Бүгінде қалада түнгі уақытта сағат 21.00-ден 04.00-ге дейін жүргізілетін ауқымды дезинсекциялық жұмыстар жалғасып жатыр. Тұрғындардың жайлы демалысы мен уақытын өткізу үшін адамдар көп жиналатын орындарға, яғни саябақтар мен жағалауларға ерекше назар аударылады, деп жазылған хабарламада.
Әкімдік дезинсекциялық шаралар кезінде мынадай сақтық шараларын ұстануға шақырады:
- Өңделетін жерге баруды қоя тұру;
- Өңдеу кезінде терезелерді жабу.
Қан соратын жәндіктердің санын анықтау және азайту жұмыстары бақылауда және ғылыми топ пен санитарлық-эпидемиологиялық бақылаудың кестелері мен ұсыныстарына сәйкес жалғасып жатыр.
Айта кету керек, кіреберістер мен жертөлелерді өңдеуді ПИК және МИБ жүргізуге тиіс.
Фото: elorda.info
