Атыраудағы әкімшілік құқықбұзушылықтар жөніндегі мамандандырылған сот үш қыздың Қазақстан туымен жасаған даулы фотосына қатысты істі қарады, деп хабарлайды Malim.kz.
Соттың баспасөз қызметі бұл туралы ресми мәлімдеме таратты.
"Сот анықтағандай, 2025 жылдың 23 наурызында Н., А. және кәмелетке толмаған Х. есімді азаматшалар Атырау қаласындағы Мұз айдыны сарайының ғимаратында Қазақстан Республикасының туы алдында араб жазуы бейнеленген суретке түсіп, оны әлеуметтік желілер арқылы таратқан. Бұл әрекет ұсақ бұзақылық болып саналады", – делінген хабарламада.
Сот олардың кінәсін құқықбұзушылық туралы хаттама, фотосурет, рапорт және өзге де іс материалдары толық дәлелдегенін атап өтті.
Нәтижесінде, сот ҚР ӘҚБтК-нің 434-бабының 1-бөлігі ("Ұсақ бұзақылық") бойынша оларды кінәлі деп таныды.
- Азаматша Н. кәмелетке толмаған адамды құқықбұзушылыққа тартқаны және оны топ болып жасағаны үшін 15 тәулікке әкімшілік қамауға алынды.
- Азаматша А. 78 640 теңге айыппұл төлеуге міндеттелді.
- Кәмелетке толмаған Х.-ның заңды өкіліне 39 320 теңге көлемінде айыппұл салынды.
Сот қаулысы әлі заңды күшіне енген жоқ.
Бұған дейін әлеуметтік желілерде беттерін бүркеген адамдардың Қазақстан туын Сауд Арабиясы жалауының элементтерімен ұстап тұрған суреті таралған болатын.
Бұл факт бойынша құқық қорғау органдары тексеру жүргізді. Атырау облысы полиция департаменті мемлекеттік рәміздерді қорлау бабымен қылмыстық іс қозғалғанын мәлімдеді. Күдіктілер анықталып, полиция бөлімшесіне жеткізілген.
Фото: әлеуметтік желі
