Ауыл шаруашылығы өнімдерінің жәрмеңкесі Астананың қай жерлерінде өтеді?
Өз өнімдерін бірінші болып Ақтөбе, Атырау және Жамбыл облыстары ұсынады
Астанада дәстүрлі ауыл шаруашылығы өнімдерінің жәрмеңкелері басталады. Олар әр сенбі мен жексенбіде 27 қазанға дейін өтеді, деп хабарлайды елорда әкімдігінің ресми сайты.
21 қыркүйекте басталатын жәрмеңкеде елордалықтарға өнімдерін бірінші болып Ақтөбе, Атырау және Жамбыл облыстарының аграршылары әкеледі. Олар ет, балық, сүт, азық-түлік өнімдерін, сондай-ақ көкеністер мен жемістерді тікелей фермерлерден ұсынады. Бұл азық-түліктің қолжетімділігін арттыруға да, отандық өндірушіні қолдауға да ықпал етеді.
Үш облыстың ауыл шаруашылығы тауарын өндірушілер Астанаға 125 тонна ет және ет өнімдерін, 250 тонна көкеністер мен жемістерді, 26 тонна сүт өнімдерін, 22 тонна балық, 26 мың жұмыртқа, 2 тонна нан-тоқаш өнімдерін және 60 тонна өзге де азық-түлік өнімдерін әкеледі.
Жәрмеңке барысында концерттік бағдарлама да ұйымдастырылады.
Айта кетейік, биыл жәрмеңке «Қазанат» ипподромына қарама-қарсы, Қарқаралы тас жолында өтеді. Сондай-ақ елорда тұрғындары мен қонақтарына ыңғайлы болуы үшін жәрмеңкелерді өткізу кезеңінде № 18, 37, 303 және 323 автобус маршруттары қамтамасыз етіледі.
Ауылшаруашылық жәрмеңкесі сағат 9.00-ден 18.00-ге дейін жұмыс істейді.
Фото: gov.kz
Байланысты жаналықтар
MalimBlocks
