Балалар омбудсмені Түркістан облысындағы біраз былықтың бетін ашты

Бала құқықтары жөніндегі уәкіл Динара Зәкиева Түркістан облысында кәмелетке толмағандардың ісімен айналысатын комиссия дұрыс жұмыс істемейтінін айтып, сынға алды.

Балалар обмудсмені жуырда Түркістан облысына барған. Сапар барысында бірқатар маңызды мәселелер анықталыпты.

Мысалы, Келес ауданында 13 жастағы жасөспірім жыныстық зорлық-зомбылық салдарынан жүкті болып қалған. Қыз бала оқу жылының басында мектепке келмеген. Мұғалімдер бұл жағдайдан хабардар болса да, ешқандай шара қабылдамапты.

- Мектеп директорының орынбасары жағдайдан хабары бола тұра еш шара қолданбаған. Істі кәмелетке толмағандар істері жөніндегі комиссияға жібермеген, – деп жазды Динара Зәкиева Facebook-тегі парақшасында.

Сарыағаш ауданындағы мектепте де ұқсас жағдай болған. Мұнда да көктемде зорлық-зомбылық салдарынан 15 жастағы қыз  жүкті болып қалыпты. Одан бөлек мұнда буллинг, бопсалау фактілері де бар.

– Сауалнамаға қатысқан оқушылар Сарыағаш ауданына қарасты ауыл мектебінде буллинг, бопсалау фактілерін айтты. Көктемде бұл мектепте бір бала суицид жасаған, сондай-ақ зорлық-зомбылық салдарынан 15 жастағы қыз  жүкті болып қалған. Бұл оқиғаларға дейін психологтар салғызған сурет арқылы екі оқушының да жағдайы дұрыс емес екені белгілі болған. Олар өзінің нашар сезінетіндерін айтуға тырысыпты. Бірақ ешкім назар аудармаған. Әлеуметтік қызметкерлер тарапынан жұмыс жүргізілмеді, - дейді Зәкиева.

Оқушылардың жүкті болып қалуы - бұл облыстағы жалғыз жаға ұстатарлық жағдай емес. Леңгірде 10 баланың қауіпті үйде аш-жалаңаш өмір сүріп жатқаны, сондай-ақ Түркістанда анасы мүгедек баласын қайыр тілуге мәжбүрлегені белгілі болды.

- Түркістанда әйел мүгедек баласын базарға шығарып, қайыр сұратқан. Леңгір қаласында 10 бала антисанитария жағдайында қауіпті үйде өмір сүріп жатыр. Көршілерінің айтуынша, шешелері маскүнемдікке салынып кеткен. Қорғаншылық және патронаж  органдары бұл отбасын  барып тексермеген, онда төрт кішкене бала бар. Балалар аш, жарығы жоқ, суық үйде өмір сүріп жатыр, – дейді омбудсмен.

Оның айтуынша, Сарығаш ауданында қорғаншылық органдарында қызметкерлер жеткіліксіз – 58 мың балаға бір қызметкер. Ал Отырар ауданында 36 отбасы полицияның есебінде тұр екен, бірақ олардың жағдайын комиссия қарамаған.

Фото: Динара Зәкиеваның Facebook-тегі парақшасынан