«Имансыз ұрпаққа жердің қажеті жоқ». Танымал асаба қазақ батырлары ислам діні үшін соғысқанын айтты

«Нұр-Мүбарак» діни университетінің құрылысына ақша жинау үшін шақырылған жиында танымал асаба Ғалымжан Құрманбек дін үшін соғыс туралы сөз қозғады, деп хабарлайды Malim.kz.

Adyrna.kz ақпараттық агенттігі асабаның сөйлеген сөзінен үзінді жариялаған. Ол Қаракерей Қабанбай мен Қанжығалы Бөгенбай секілді қазақ батырлары жер үшін емес, ислам діні үшін соғысқанын айтады.

«Қазақ еліне, оның ішінде мұсылмандарға жан-жақтан дін дұшпандары, ел дұшпандары анталап тұр. Оны күн сайын көзімізбен көріп отырмыз. Күн сайын құлағымызбен естіп, жүрегімізбен сезіп отырмыз. Жыл санап, ай санап, күн санап, сағат санап, сәт санап, дін дұшпандары бізді сонау бабабалардан келе жатқан, сақтан келе жатқан салтымызды, ғұннан келе жатқан ғұрпымызды, діннен бастау алған дәстүрімізді, әлімсақтан келе жатқан әдебімізден айыру үшін түрлі сұрқия әрекеттер жасап жатыр. Мынау жиын ұрпақтарымызды қарсы тұруға дайындау үшін жасалып отыр. Ұрпақтарымызды жігерлі, иманды, инабатты, ибалы, жері мен отанын сүйетін, өйткені атам қазақ «Отанды сүю иманнан» дейді. Кешегі Қабанбай, Бөгенбай, Наурызбай, Махамбет, Исатай, Райымбек, Қарасайлар жер үшін соғысқан жоқ. Ислам үшін, ата-дініміз үшін соғысты. Өйткені, имансыз ұрпаққа жердің қажеті жоқ еді. Мына жерге ие болатын иманды ұрпақтың діні үшін соғысты, ағайын. Алла жолында соғысты. Міне, осы заманның батырлары сіздерсіздер. Сол соғысты жалғастырып келе жатқан сіздерсіздер, игі жақсылар», - дейді ол.

Асабаның сөзі әлеуметтік желіде қызу талқыланып жатыр. Желі қолданушылары мұндай мәлімдеме жасаған асабаны жауапқа тартуды талап еткен.