Маңғыстауда мұнайшы еңбек орнында қайтыс болды. Туыстары әділдікті талап етеді

«West Oil Software» компаниясында жұмыс істейтін Алмас Көрпеғұлов 28 қаңтарда жұмыс орнында қайтыс болған, деп хабарлайды www.lada.kz сайтына сілтеме жасап www.malim.kz.

Бұл туралы редакцияға қайтыс болған жігіттің туыстары хабарлаған. Олардың айтуынша, компания басшылығының еңбек қауіпсіздігіне немқұрайлы қарауы, қызметтік міндеттерді елемеуі және лауазымдық нұсқауларды бұзуы апатқа себеп болған.

Туыстарының айтуынша, қайғылы жағдай 2025 жылғы 28 қаңтарда «West Oil Software» компаниясының өндірістік алаңында болған.
– Апат жұмыс күні өндірістік аумақта болды. Алмас 12 метрлік арматураларды көтеру үшін тиегіштің рөліне отырған. Бірақ жұмыс барысында арматуралар техниканың үстіне құлап, нәтижесінде ол сол жерде қайтыс болды. Алмас «West Oil Software»-да автомобильдерді жөндеу слесары болып жұмыс істеген және оны осы техниканы басқаруға жіберуге болмайтын еді. Компания басшылығының еңбек қауіпсіздігі мәдениетіне немқұрайлы қарауы, қызметтік міндеттерін орындамауы және лауазымдық нұсқауларды бұзуы салдарынан біздің жалғыз ұлымыз қайтыс болды. Ол отбасындағы жалғыз асыраушы еді, - дейді қайғыдан есеңгіреген туыстары.

Туыстарының айтуынша, Алмасты еңбек келісімшартында қарастырылмаған тапсырмаларды орындауға талай мәрте тартқан, соның ішінде техникалық құрылғы – тиегішті басқаруға мәжбүр еткен.
– Еңбек қауіпсіздігіне жауапты лауазымды тұлға автомобильдерді жөндеу слесарын тиегішті басқаруға жұмсаған, оның бұл техниканы басқаруға рұқсаты жоқ болатын, бұл қалыптасқан немқұрайдылықтың белгісі, – деді туыстары.

Алмас небәрі 30 жаста болатын, ол әлі отбасын құрып үлгермеген, барлық күш-қуатын және уақытын мүгедек әкесіне күтім жасауға арнаған.
Марқұмның ата-анасы тергеудің дұрыс жүргізілмеуінен және кінәлі адамдардың жазаланбауынан қорқып отыр.

– Біз апатты объективті түрде тергеледі деген үміттеміз. Мұндай қайғылы оқиғалар ешкімнің басынан түспесін деп тілейміз, кінәлілерді жазалауды талап етеміз, – деп мәлімдеді туыстары.

Маңғыстау облысы бойынша мемлекеттік еңбек инспекциясы департаменті тергеу жүргізіліп жатқанын хабарлады, қазіргі уақытта олар оқиғаның мән-жайы туралы толық ақпарат бере алмайды.

«West Oil Software» компаниясы  – «ҚазМұнайГаздың» еншілес кәсіпорнына қызмет көрсететін ұйым. 2024 жылы «West Oil Software» жұмысшылары Жетібайда 140 күнге созылған ереуіл ұйымдастырған, ол мұнайшылардың жеңісімен аяқталған.

Фото: Lada.kz редакциясының коллажы.