17 мыңнан астам әскери қызметшінің кредиті кейінге шегерілді. Бұл туралы ОКҚ алаңында өткен брифингте Қарулы күштері бас штабы бастығының орынбасары Сәкен Жүсіпов айтты, деп хабарлайды Malim.kz.
Оның айтуынша, қазірдің өзінде 17 мыңнан аса әскери қызметшіге 6,6 млрд теңгеге негізгі борыш пен сыйақы бойынша «кредиттік демалыс» берілген.
Қорғаныс ведомствосының бастамасы мерзімді қызметтегі әскери қызметшілерге борышын өтеу кезеңінде несиелерін уайымдамауға мүмкіндік береді. Меморандумды іске асыру үшін агенттікпен және қаржы ұйымдарымен өзара іс-қимылдың арнайы алгоритмі әзірленген. Шақыру науқаны барысында жиналған банк қарыздары мен микрокредиттер туралы мәліметтер бірден қаржы нарығын реттеу және дамыту агенттігіне жіберіледі. Деректер негізінде кредиторлар негізгі борыш, сыйақы бойынша төлемдерді кейінге қалдыру және берешекті өндіріп алудың барлық міндеттемесін тоқтата тұру мәселелерін пысықтайды. Төлемдерді кейінге қалдыру кезеңінде несие беруші сот ісін жүргізуді, берешекті өндіріп алу бойынша нотариусқа жүгінуді, тұрғын үйді сатуды, қарыз алушының отбасын шығаруды тоқтатады. Өткен сот актілері бойынша берешекті өндіріп те алмайды.
Фото: Қорғаныс министрлігі
