Қостанай облысындағы су басқан елді мекендерден бір түнде 150 адам құтқарылды
Өткен тәулікте Қостанай облысындағы су басқан елді мекендерден 150 адам құтқарылды. Олардың 63-бала.
Эвакуациялауға әскери тікұшақ қолданылды, деп хабарлайды Malim.kz.
Республикалық жедел штабтың үйлестіруімен Жаңақала, Екідің, Аққысы, Қызылжұлдыз ауылдарының және Қостанай облысының 9 қыстағының тұрғындарын эвакуациялау бойынша құтқару операциясы жүргізілді. Көмек көрсетілген азаматтар Арқалық қаласының эвакуациялық пункттеріне жеткізілді.
Қостанай облысының әкімі Құмар Ақсақалов мемлекет зардап шеккендерге келтірілген залалды өтейтінін мәлімдеді.
Айта кетейік, наурыздың бірінші онкүндігінде елдің шығыс және оңтүстік аймақтарында бір мезгілде жауын-шашын мол түсіп, ауа температурасы көтерілуіне байланысты бірқатар елді мекендерді су басты.
ТЖМ хабарлауынша Абай, Ақмола, Ақтөбе, Шығыс Қазақстан, Батыс Қазақстан, Қостанай және Павлодар облыстарында еріген қар суын тарту жұмыстарымен бірге құм салынған қаптарды төсеу жұмыстары жүргізіліп жатыр.
Фото: tobolinfo
