Атышулы Талғар ісі бойынша 15 тәулікке қамалып, кеше босатылған Қаржаубай Нұрымовтың қарындасы Бақыт Реимова да бостандыққа шығып, отбасына оралды, деп хабарлайды Malim.kz.
Бұл туралы блогер Жан Ахмадиев өзінің желідегі парақшасында жариялады.
Бақыт отбасына өзінің туған күнінде оралды, - деп жазды блогер.
Блогермен бірге Бақыттың қуанышына заңгер Мейірман Шекеев те барған. Реимованың Қазақстанда қалу-қалмауы туралы заңгер алдағы күндері айтатынын, дегенмен елде қалдыру үшін жұмыс жасап жатқандарын айтқан.
Айта кетейік, Алматы облысының Азат ауылында Нұрғанат Ғайыпбаевты жерлеу рәсімінде Шерзат Болаттың әкесін полиция ұстап әкетті. Шерзаттың әкесі Қаржаубай Нұрымов жүк көлігінің үстіне шығып, өз-өзін өлтіретінін айтып қорқытқан. Облыстық Полиция департаменті оның қоғамдық тәртіп пен айналасындағылардың, оның ішінде кәмелетке толмаған балалардың қауіпсіздігіне қауіп төндіргенін алға тартты.
Ал Шерзаттың әпкесі Бақыт Реимова митингіге үндеді деп айыпталып, сот оны да 15 тәулікке қамап, Қазақстаннан депортациялау жөнінде шешім шығарған.
Фото: Видеодан алынған
