Су тасқыны: Құлсарыда зардап шеккендерді маңғыстаулық тұрғындар өз ауылдарына әкетіп жатыр
Ерікті тұрғындар мектеп, мешіт және үйлерде оларға жататын орындары мен ас-суларын дайындап қойған.
Атырау облысы Құлсары қаласына Жаңаөзен қаласы, Шетпе, Жетібай, тағы да басқа аудандардан тұрғындар келіп, тасқын судан зардап шеккендерді өз елді мекендеріне алып кетіп жатыр, деп хабарлайды Malim.kz.
Ерікті тұрғындар мектеп, мешіт және үйлерде оларға жататын орындары мен ас-суларын дайындап қойған.
Еріктілердің айтуларынша, көрші атыраулықтардың апаттан зардап шегіп жатқанына бейжай қарай алмаған. Сондықтан да атқа қонып, қарапайым халыққа көмек қолын созуды ұйғарған.
Осылайша, бірнеше ауданнан ерікті түрде келгендер құлсарылық ағайынды өз өңірлеріне паналатуды шешіпті.
ТЖМ хабарлауынша, Маңғыстау облысында 83 мың адамға арналған 200 аса эвакуциялық бөлім ашылған.
Құлсарыдағы су тасқынының алдын алу үшін Маңғыстау, Ақтөбе, Алматы және тағы басқа өңірлерден ТЖМ және Қорғаныс министрлігінің құтқарушылары барған.
4-сәуір күні Атырау облысы, Жылыой ауданында Жем өзені тасып, аймақта Төтенше жағдай жарияланған. 5-сәуір күні Құлсары қаласын қарғын су басып қалды. Соңғы мәліметке қарағанда, қалада 2500 үй су астында қалған.
Наурыз айының соңынан бастап Қазақстанның бірнеше облысында еріген қар суы мәселесі туындады. Қазіргі таңда Қостанай, Ақмола, Батыс Қазақстан, Қарағанды, Атырау, Ақтөбе, Семей облыстарында қарғын сумен күрес жүріп жатыр.
Фото: Өркен ЖОЯМЕРГЕН
