Белгілі қоғам белсендісі, журналист Гүлбану Әбенова «Болашақ» бағдарламасымен шетелде білім алған танымал әнші Айгүл Иманбаеваны сынады, деп хабарлайды Malim.kz.
Белсендінің айтуынша, әнші ағылшын тілінен емтихан тапсырмаған. Сондай-ақ оған оқуына қатысты бірде-бір жазба жарияламағанына шүйлікті.
«Болашақ» бағдарламасының 50 жастағы студенті Лондоннан оралды. Instagram парақшасынан байқағанымыздай, ол бір жыл бойы "шоппинг жасап, күшті көңіл-күйде" жүрді. Ағылшын арт-менеджменті туралы бірде-бір жазба жариялауды жөн деп таппады. Ол Тұманды Альбиондағы бір жылдық демалысы үшін кімге алғыс айтады? Әрине, PR және роудшоу министрі Саясат Нұрбекке. Өйткені, ол Саясат Нұрбектің арқасында ағылшын тілінен емтихан тапсырмай-ақ, салық төлеушілердің ақшасы есебінен ағылшын тілінде оқуға кетті, - деп жазған Гүлбану Әбенова.
Ол бұған қоса Димаш Құдайбергенге қатысты оқиғаны баяндады.
Дәл осындай бақытты билетті Саясат Нұрбек тағы бір музыкалық орындаушыға, Димашқа сыйлаған болатын. Бірақ менің:"табысты және өзін қамтамасыз ететін Димаш өз есебінен шетелге оқуға баруға, сондай-ақ басқа дарынды түлектерге оқу ақысын төлеуге қауқарлы" деген шулы жазбамнан кейін ол "Болашақ" стипендиясынан бас тартатынын мәлімдеді. Мықты! Кейінірек ол кинорежиссер ретінде оқуға америкалық мектепке барды… - деп жазған қоғам белсендісі.
Айта кетейік, әнші Айгүл Иманбаева бірер күн бұрын Англиядағы оқуын тәмамдап, Instagram парақшасында диплом алғанын жазған еді.
Лондонға оқуға кеткеніме көзді ашып-жұмғанша бір жыл өтіпті. Елге қайтатын уақыт та келді. Өремнің өрісін кеңейтіп, білімімді шыңдап, жақын дос,орта тауып, үлкен баға жетпес байлықпен келе жатырмын. Қазақ өнеріне де өз үлесімді қосып, өрелі, өнерлі, білімді шәкірт тәрбиелеп, өнерге осында алған біліміммен ары қарай жаңалық енгізсем деп келе жатырмын.
Білім іздеген жандарға еш уақытта кеш емес және әлемнің есігі қай жаста да, кімге де болса ашық, - деп қуанышымен бөліскен еді.
Фото: интернеттен
MalimBlocks
