Жетісу облысында 7 мыңнан астам балаға полиомиелитке қарсы вакцина егілмеген
Жауапты тұлғалардың салғырттығынан қажетті вакцина уақтылы сатып алынбаған.
Жетісу облысында денсаулық сақтау саласындағы жауапты лауазымды тұлғалардың кінәсінен қажетті вакцина уақтылы сатып алынбаған. Нәтижесінде бір жыл көлемінде 7 мыңнан астам балаға полиомиелитке қарсы вакцина егілмеген. Облыстық прокуратура вакцинация туралы заңнаманың бұзылғанын анықтады.
- Бюджет қаражатын тиімсіз жұмсау, вакцинация туралы заңнаманы бұзу, жалған вакцинация жасау және басқа да заң бұзушылықтарды анықтады. Сондай-ақ, «А» гепатитіне қарсы препараттың артық мөлшеріне қарамастан, 2023 жылы 135 млн теңгеден астам сомаға қосымша 35 мың вакцина сатып алынған, - делінген хабарламада.
Ал заң бойынша вакцинаны сақтау мерзімі 6 айдан аспауы керек.
Қадағалау актісі бойынша облыстың Денсаулық сақтау басқармасы басшысының орынбасарын қоса алғанда, 11 лауазымды тұлға тәртіптік жауапкершілікке тартылды. Сондай-ақ 126 тұлға жалпы сомасы 8,5 млн теңгеге әкімшілік жауапкершілікке тартылды.
ФОТО: ИНТЕРНЕТТЕН
