Нұр-Сұлтан қаласының әкімі Алтай Көлгінов халықпен кездесуінде LRT құрылысына қатысты мәлімдеме жасады. Онда ол атышулы құрылыс нысанын қайта жандандыру үшін инвесторлар іздестіріліп жатқанын айтты.
«Иә, аяқсыз қалған құрылыс нысандары қалаға көрік бермейді. Қыруар қаржы жұмсалды. Сол себепті жұмысты ары қарай жалғастырамыз. Қазір инвестиция тарту мақсатында банктермен келіссөз жүргізіп жатырмыз», - деді Көлгінов.
2019 жылдың жазында сол кездегі қаржы министрі Әлихан Смаилов LRT құрылысына Қазақстан Қытайдың мемлекеттік даму банкінен 1,5 млрд доллар қарыз алып, оның 344 миллионы құрылысқа жұмсалғанын мәлімдеген. Бұдан бөлек, ол LRT төңірегіндегі даудан кейін Қытай тарапы қаржыландыруды тоқтатқанын, енді үкімет құрылысты аяқтау үшін 1,2 млрд доллар қаржы бөлуді жоспарлап отырғанын айтқан.
Мысыр пирамидасына бергісіз алып «Astana LRT» құрылысы 2011 жылы басталып, 2020 жылы аяқталуы тиіс болған. Бірақ қазір елорда көшелерінде халық арасында «жемқорлық символы» аталынып кеткен бетон бағаналар ғана тұр. Биыл құрылыстың 10 жылдық юбелейі.
LRT құрылысының қаржысын жымқырды деген айыппен «Astana LRT» басшысы Талған Ардан мен Нұр-Сұлтан қаласы әкімінің бұрынғы орынбасары Қанат Сұлтанбековке іздеу жарияланған.
