Партияға жүктелген міндет – «Жаңа Қазақстан» тұжырымдамасын жүзеге асыру – журналист Nur Otan-дағы модернизация туралы
Nur Otan партиясы бұдан былай Amanat деп аталатын болды. Ал, оның жұмыс істеу жүйесіне бірқатар өзгеріс енгізіледі. Бұл туралы бүгін партияның кезектен тыс өткен XXII Съезінде айтылды.
Аталған өзгерістер негізінен халықпен жұмысты күшейтуге, жастарды қолдауға бағытталған. Елімізге белгілі журналист Асхат Садырбайдың айтуынша, заман, адам, қоғам өзгеріп жатқанда, Nur Otan партиясының өзгеруі де заңдылық. Алайда, оның тек атауы ғана емес, ең алдымен жұмыс істеу принциптері өзгерісек ұшырауы тиіс дейді ол.
«Саяси ұйымның аты ауысты, ал заты ше? Ел-жұртты алаңдатқан ең үлкен сауал осы. Ең алдымен партияға жүктелген міндет – «Жаңа Қазақстан» тұжырымдамасын жүзеге асыру. Бұл әлбетте партияның жүйелі құрылымы мен еліміздің барлық аймақтарындағы бөлімшелері, Jas Otan жастар қанаты арқылы тезірек жүзеге асатыны белгілі.
Мемлекет басшысы партияға үлкен үміт пен сенім білдіре отырып бірқатар тапсырмаларды жаңа бағытта орындауды тапсырды. Сондай-ақ ең бірінші кезекте мемлекет басшысы партиядағы бюрократияны жоятынын айтты», - деп жазды А.Садырбай өзінің Facebook-парақшасында.
Оның пікірінше, жарияланған реформаларды табысты жүзеге асыру үшін ең бастысы негізгі саяси күш – табандылық мен парадигманы түбегейлі өзгерту қажет. Яғни, партия жұмыс бағытын өзгертіп, нұсқаулықтарды формальды түрде орындаудан алшақтап, «далада» жұмыс істеуге тиіс.
«Бұл партияға жаңа серпін береді, оның ұтқырлығын арттырады, азаматтардың өтініштеріне тез жауап беруге, тиімді кері байланыс орнатуға, мемлекеттік органдармен өзара іс-қимылда азаматтардың мүдделерін табанды және дәйектілікпен қорғауға мүмкіндік береді деп ойлаймын», - деп сөзін түйді журналист.
