Қаңтар оқиғасы. ҰҚК мен Полиция ғимаратты қаруымен бірге қалдырған

Қаңтар оқиғасы кезінде күдікке ілінген күш құрылымдарының басшылары туралы мәліметтер анықталды. Бұл жөнінде  Бас прокуратура өкілі Е.Қилымжанов хабарлады.  

Оның мәліметінше, 5 қаңтарда Алматы қаласында, Алматы, Жамбыл және Қызылорда облыстарында 2 полиция департаменті мен 3 Ұлттық қауіпсіздік комитеті департаменттерінің басшылары өз ғимараттарын  қаруымен бірге қалдырып кеткен.  
  
«Арнайы прокурорлар күш құрылымдарының жекелеген басшыларына қатысты тергеуді жалғастырып жатыр. Олардың бәрі күдікті деп танылды. Осы фактілер бойынша қызмет бабындағы әрекетсіздік жөнінде 9 қылмыстық іс қозғалды», - деді Бас прокуратура өкілі.  Сондай-ақ, Алматы әуежайында желілік полиция бөлімшесін басқарған адамның да күдікке ілінгені хабарланды. Ол уақытша ұстау изоляторына қамалған. 

Е.Қилымжанов басқа да тұлғаларға қатысты дәлелдемелерді жинау және талдау жүргізіліп жатқанын айтты.